Игорь же совкупивъ вои̇ многи

Submitted by admin on Fri, 02/26/2021 - 16:44
Номер Летописи
964.00
Лаврент. РНБ, F.п.IV.2

В лѣт҇. ҂ꙅ҃. у҃. н҃в.:.

Игорь же совкупивъ вои̇ многи · варѧги русь и по|лѧны · словѣни и̇ кривичи · и тѣверьцѣ и̇ печенѣ|ги ·и̇ тали ѹ нихъ поꙗ · пои̇де на греки въ лодьꙗх҇ | и̇ на конихъ хотѧ мьстити себе · се слышавше ко|рсунци · послаша къ раману глщ҃е · се и̇де русь бе щисла корабль · покрыли суть море корабли · та|ко же и̇ болгаре послаша вѣсть · глщ҃е и̇дуть русь | и̇ наꙗ̇ли суть к собѣ печенѣги · се слышавъ цр҃ь | посла к игорю лучиѣ̇ болѧре · молѧ и̇ гл҃ѧ · не хо|ди но возьми дань ю̇же и̇малъ ѡ̈легъ · прида|мь и̇ е̇ще к тои̇ дани · тако же и̇ къ печенѣгомъ | посла паволоки и̇ злато много · и̇горь же дошед || (л. 11) дунаꙗ · созва дружину и нача думати · повѣда | и̇мъ рѣчь цр҃ву · рѣша же дружина и̇горево · да а̇ще сице | гл҃ть цр҃ь · то что хочемъ боле того · не бившесѧ и̇ма|ти злато и̇ сребро · и̇ паволоки · е̇гда кто вѣсть кто | ѡ̈долѣе̇ть мы ли ѡ̈не ли · ли с моремъ кто свѣте|нъ · се бо не по земли ходимъ · но по глубинѣ морь|стѣи · ѡбьча см҃рть всѣмъ · послуша и̇хъ игорь · и̇ | повелѣ печенѣгомъ вое̇вати болъгарьску землю · | а самъ,вземъ ѹ грекъ злато и̇ паволоки · и̇ на всѧ | воꙗ̇ · и̇ възратисѧ въспѧть · и̇ приде къ кие̇ву

въсвоꙗ̇си.:.

Ипат. БАН, 16.4.4

В лѣто. ҂ѕ҃. у҃. н҃в.:. Игорь совокупи воꙗ многы. Варѧгы. и Русь. и Полѧны. || (л. 18) и Словѣны. и Кривичи. и Тиверци. и Печенегы ж наꙗ. и тали в нихъ поемъ. хотѧ мьстити себе. се слышавше Курсунци. послаша къ Роману глюще. се идуть Русь покрыли суть море корабли. тако же и Болгаре. послша вѣсть гл҃ще. идуть Русь. и Печенѣгы наꙗли суть к собѣ. се слышавъ цсрь посла къ Игореви лутьшии боꙗры. молѧ и гл҃ѧ. не ходи но возьми дань. юже ималъ Ѡлегъ. и придамъ еще къ тои дани. тако же и Печенѣгомъ послаша. паволокы и золото много. Игорь же дошедъ Дунаꙗ, съзва дружину и нача думати. и повѣда имъ рѣчь цс҇рву. ркоша же дружина Игорева. да аще сице гл҃ть цс҇рь. то что хочемъ боле того. не бившис҇ имати злато и серебро. и паволокы. еда кто вѣсть кто ѡдолѣеть. мы ли ѡни ли. или с моремъ кто свѣтенъ. се бо не по землииходимъ. но по глубине морьстии. и ѡбьча см҃рть всемъ. и послуша ихъ Игорь. и повелѣ Печенегомъ воевати Болгарьскую землю. а самъ вземъ ѹ Грекъ злато и паволокы. на всѧ воꙗ. възвратисѧ въспѧть. и приде къ Киеву въ своꙗси.:.