Иде и̇горь на греки

Submitted by admin on Fri, 02/26/2021 - 16:15
Номер Летописи
961.00
Лаврент. РНБ, F.п.IV.2

В лѣт҇. ҂ꙅ҃. у҃. м҃ѳ.:. –

Иде и̇горь на греки · ꙗ̇ко послаша болгаре вѣ|сть ко цр҃ю · ꙗ̇ко и̇дуть русь на цр҃ьградъ · скѣ|дии̇ ·і҃· тысѧщь · и̇же придоша и̇ приплуша · | и почаша вое̇вати вифаньскиꙗ̇ страны · и | вое̇ваху по понту до а̇ръкаѣꙗ̇ · и̇ до фафлого|ньски земли · и̇ всю |  страну никомидии̇скую ·| поплѣнивше и̇ судъ весь пожьгоша · и̇х же е̇мше ѡ|вѣхъ растинаху · другиꙗ а̇ки странь поставл | ю̇ще · и̇ стрѣлѧху въ нѧ · и̇зимахуть ѡ̇паки ру|цѣ съвязывахуть · гвозди желѣзныи̇ посреди | главы въбивахуть и̇хъ · много же ст҃хъ црк҃ви | и̇ ѡ̈гнемъ предаша · манастырѣ и̇ села пожь|гоша · и̇ и̇мѣньꙗ немало ѡ̈бою̇ страну взяшѧ | потомъ же пришедъшемъ вое̇мъ ѿ въстока · | памъфиръ деместикъ · съ ·м҃·ми тысѧщь · | фока же патрекии̇ съ макидоны · федоръ | же стратилатъ съ фраки · с ними же и саино|вьницы боꙗ̇рьстии̇ · ѡ̈бидоша русь ѡколо · | съвѣщаша русь изидоша въружившеся на | греки · и̇ брани межю и̇ми бывши зьли · ѡдва | ѡ̈долѣша грьци · русь же възратишася къ дъ|(л.10об.)ружинѣ своеи̇ къ вечеру · на ночь влѣзоша в ло|дью̇ и ѿбѣгоша · феѡ̈фанъ же сустрѣте ꙗ̇ въ лѧ|дехъ со ѡ̈гнемъ · и̇ пущати нача трубами ѡ̈гнь

на лодьѣ̇ рускиꙗ̇ · и̇ быс҇ видѣти страшно чюдо · ру|сь же видѧщи пламѧнь · вмѣтахусѧ въ воду | морьскую · хотѧще ѹбрести · и̇ тако прочии въ|зъвратишасѧ въсвоꙗ̇си · тѣм же пришедши|мъ въ землю свою · и̇ повѣдаху кождо свои̇мъ ѡ̈ | бывшемъ · и̇ ѡ̈ лѧдьнѣмь ѡ̈гни · ꙗ̇ко же моло|ньꙗ̇ реч҇ · и̇же на нбс҇хъ грьци и̇муть ѹ собе · и̇ се пу|щаю̇ща же жагаху насъ · сего ради не ѡ̈долѣхо|мъ и̇мъ · и̇горь же пришедъ нача совкуплѧти | воѣ̇ многи · и посла по варѧги многи за море · | вабѧ е̇ на греки · паки хотѣ пои̇ти на нѧ.:,–

Ипат. БАН, 16.4.4

В лѣто. ҂ѕ҃. у҃. м҃ѳ.:. Иде Игорь на Грѣкы, и ꙗко послаша Болгарѣ вѣсть къ цс҇рю. ꙗко идуть Русь на Цс҇рьград. скѣдии. і. тысѧщь. иже и поидоша. и приплуша и почаша воевати. Вифаньскыꙗ страны. и плѣноваху по Понту. до Ираклиꙗ. и до Фофлагоньскы землѧ. и всю страну Никомидииску҇ю пополониша. и Судъ всь пожьгоша. ихъ же емъше ѡвѣхъ растинаху. и || (л. 17об.) другиꙗ эе сторожи поставьлѧюще стрѣлами растрѣлѧху. и изъламлѧху ѡпакы руцѣ свѧзавше. и гвозды желѣзны посредѣ головъ въбивахуть има. мьного же и ст҃хъ црквии ѡгьневи предаша. и имѣнье не мало ѡбою сторону взѧша. потомъ же пришедшемъ воемъ ѿ въстока. Панфиръ. деместикъ. съ четырми десѧть тысѧщь. Фока же патрикии съ Македоны. Феѡдоръ же стратилатъ съ Фракы. и с ними же и сановници боꙗрьстии. ѡюидоша Русь. ѡколо. и свѣщаша Русь и изидоша противу въѡружившесѧ на Грѣкы. и брани межю има бывши злѣ. ѡдва ѡдолѣша Грѣци. Русь же възвратишасѧ къ дружинѣ ствоеи к вечеру. и на ноць влѣзъше въ лодьꙗ ѿбѣгоша. Феѡфанъ же ѹсрѣте ꙗ въ ѡлѧдѣхъ съ ѡгнемь. и нача пущати ѡгнь трубами на лодьꙗ Рускыꙗ. и быс҇ вїдѣти страшно чюдо. Русь же видѧще пламень вмѣтахусѧ въ воду морьскую. хотѧще ѹбрѣсти. и тако прочии възвратишасѧ въ своꙗси. тѣмь же пришедъшимъ в землю свою. повѣдаху кождо своимъ. ѡ бывшемъ. и ѡлѧдьнемъ ѡгни. ꙗко же молоньꙗ реч҇. иже на н҃бсихъ Грѣци имуть в себе. и сию пущающе жьжаху насъ. и сего ради не ѡдолѣхом҇ имъ. Игорь же пришедъ. и нача съвокупити вои многы. и посла по Вѧрѧгы за море. вабѧ и на Грѣкы. пакы хотѧ поити на нѧ.:.

Новг. 4я. РНБ, Пог. 2035

В лѣто 6449. Иде Игорь на Грѣкы, и яко послаша Болгаре вѣсть къ царю, яко идѹть Рѹсь на Царьградъ скѣдии, 30000 глаголемѣ отъ рода Варяжьска сущимъ; иже придоша и приплуша іюня въ 10, и почаше воевати Виѳаньскіа страны, и плѣняху по Понтѹ до Араклия и до Фаѳлогонскиа земли; и поплѣнівшѣ всю странѹ Нікомидиску, много же и веліе сътвориша Рѹсь, преже даиже Грѣческимъ воемь не приспѣвшимъ; тогда бо и Сѹды вси пожгоша огнемь. А ихже имше плѣннікы, тогда всѣхъ ростинаху, иныхъ же к земли присѣчахѹ, дрѹгыя же, яко стража поставляюще, стрѣлами растрѣляхѹ, елико же ратніческому чинѹ творяхѹ, и издамаху опако || (л. 6об.) руцѣ связавше, и гвозды желѣзныа посрѣде главы вбивахѹ имь; много же святыхъ церквии огнви предаше, монастыри пожгоша, и именіе много обою страну взяша. Тѣмъ же пришедшимь воемь отъ востока, Панфиръ деместикъ съ 40, Ѳока же патрикии с Макидоны, Феодоръ же стратилатъ съ Рфаки, с ними же и сановници боярьстии, и обидоша Русь около. И свѣща Русь, изидоша, въорѹжившеся, на Грѣкы, и брани межи ими бывше злѣ, и одва одолѣвше Грѣци; Рѹсь възвратишася къ дружинѣ своеи к вѣчерѹ, на ночь же влѣзоша в лодія и отбѣгоша. Романъ же посла на дромоны, елико бѣху в Константинѣ гради, с Феофаномъ с патрикиемъ на Рѹсь. Феофанъ же лодѣиныя воа ѹрядивъ преже и ѹготовивъ, потомъ же и слезами себѣ твердивь, Руси ожидаа в лодіяхъ, на ня хотя ити, искрь столпа, глагоемаго ѳоро, стражница, в неиже огнь влагаемь на просвѣщеніе в нощи; и се на ѹстьи Понта стражю дѣа, зане тѹ частное разбоинічество, на страны нагнаніа, ихже изби [И]раклии. Тѹ дожда полку Рускыхъ, раздрѹши лодіа и ѹстроеномъ огнемъ пожже; ѹстрѣте бо а во олядехъ съ огнемъ, и пѹщати поча трубами || (л. 7) огнь на лодиа Рѹскыя, и бысть видѣти чюдо страшно. Рѹсь же, видяще пламень, вметахѹся въ водѹ морьскѹю, хотще ѹбрести, и мнози погибоша, и тако прокъ лодии възратишася на побѣгъ въ своасі. Тѣмъ же пришедшимъ в землю свою, повѣдаша воиждо своимъ о бывшемь и оляднемь огни: «якоже молніа, рече. иже на небесехъ, Грѣцѣ имѹть ѹ себѣ, иже пѹщахѹ, жжаху насъ, и сего ради на одолѣхомъ имъ». Игорь же, пришедъ, нача съвокѹпляти вои многы, посла на Варягы за море, вабяд а на Грѣкы, и пакы хотя ити на Грѣкы.