0191. А῎спид глухїи, соста́вом до колѣн҇. подобен҇ во всем краснои девицы. а҆ с колѣнъ о῎бѣ но́ги свилися. а҆ на концы ѕмиева глв҃а. а наѕадѣ на спинѣ крилѣ вели́цы о҆стры̀. желѣѕо и҆ камень пресѣцают на́ полы. жилище и҆мѣет на море. и҆ на горѣ высоцѣ на камени. о҆прочѣ горы и҆ камени не ложи́тся нигдѣ. лѣтает по виноградом тѣм питается. и҆ напитався прилѣтѣв҇ спит на камени в пꙋстом мѣсте. ловцы же о҆щутꙗт ꙗ῎ко отлетѣл҇ е῎сть по виноградом. приходꙗт і҆ ископают себѣ в ѕемлѝ ꙗ῎мꙋ вели́ку, и҆ ѕдѣлают на всѣх четырех странах по о҆кнꙋ̀. и҆ возмут с собою д҃. трꙋбы. и҆ повелꙗт себе сверхꙋ зе́млею ѕасыпат на́крѣ́пко ꙗ῎мꙋ. || (л. 13) и҆ сровнꙗют з ѕемле́ю. и҆ как҇ а῎спид насытився прилѣтит и҆ѕ винограда. и҆ лꙗжет на камени почивати, и҆ ловцы̀ ѕатрꙋбят и҆з одного о҆кна̀ в трꙋбꙋ. і҆ ѡн҇ на тру́бныи глас҇ бро́сится к окнꙋ̀. і҆ о҆нѣ̀ вострꙋбꙗт на дрꙋгои странѣ. и҆ он҇ тꙋдѣ̀ бросится. и҆ тако творꙗт, дондеже его у҆томꙗт. и҆ как҇ ѡн҇ у҆томи́тся. и҆ он҇ вѕыдет на тот же ка́мень. и҆ о҆нѣ̀ начнут трубѣти и҆зо всѣх четырех о῎кон҇ в трубы̀. і҆ ѡн҇ не терпꙗ гласа трубнаго слы́шати. хо́ботом своим провертит своѝ у῎ши насквоз, и҆ свие́тца в колцѐ. і҆ от того̀ тре́снет. и҆ свое́ю кро́вию ка́мень ве́сь о҆бо́льет. ꙗ῎ко и҆ внꙋ́тренꙗя вся̀ ка́меню о҆багрится кровию его̀. и҆ напие́тся ка́мень кро́ви а῎спидовы. и҆ бу́дет ꙗ῎ко те́мно о҆сѣнен҇. и҆ ловцы̀ тот камен҇ роѕбивают. і҆ отвозꙗт по мно́гим гдрс҇твам. || (л. 13об.) А҆ и҆ны́е гл҃ют а῎спид зме́и, невысоко летает. а῎ще бы высоко лѣтал҇, погубил҇ бы всю странꙋ̀ гдѣ̀ живет. а҆ ка́мень де а῎спид вынима́ют у него̀ из глв҃ы. и҆ дорог҇ велмѝ е῎сть.
л. 12об.–13об.